Жолооны үнэмлэх шинээр авах, хаяж үргэдүүлсний улмаас дахин захиалсан иргэдийн үнэмлэх хэвлэгдэж гарч ирэх хугацаа буюу 21 хоногтоо багтаж гарахгүй байгаад иргэд бухимдалтай байна. Үүний дагуу холбогдох байгууллагаас тодруулсан юм.
“Смарт Солюшнз” ХХК үнэмлэхний бэлдэц, хор, дагалдах хэрэгслийг нийлүүлэх тендерт шалгарсан. Өмнөх жил нь мөн адил тус ажлыг хариуцаж байсан. Гэтэл өршөөлийн тухай хууль /2015.08.11/ батлагдсанаар төлөвлөгөөнд ороогүй байсан 80 мянга эрхээ хасуулсан хүний үнэмлэхийг хэвлэх гэнэтийн их ажилтай болжээ. Тус хуулийн дагуу тээврийн хэрэгсэл жолоодох эрх нь хасагдсан 80 гаруй мянган хүний эрхийг сэргээгээд тэдэнд үнэмлэхийг нь хэвлэн олгосон аж. Ийм учраас 2016 оны жолооны үнэмлэхний захиалга хойшилсон гэж албаныхан тайлбарлалаа.
Дээрх шалтгаанаас гадна жолооны үнэмлэх хэвлэх явц яагаад удааширсан тухай ЦЕГ-ын Лицензийн төвийн мэргэжил хяналтын газрын дарга, Цагдаагийн дэд хурандаа Б.Лхагвасүрэнгээс тодрууллаа.
-Иргэдэд үнэмлэх олгох хэвийн хугацаа нь 21 хоногт гаргадаг байсан бол сүүлийн Тендерт оролцож шалгарсан “Смарт Солюшнз” ХХК-ийн эсрэг тендерт оролцож байсан бусад компаниуд шүүхэд гомдол гаргаснаар “Смарт Солюшнз” ХХК –тай гэрээгээ хийлгүй хэсэг хугацаа алдчихсан. Уг нь гэрээний дагуу бэлдэц, хор, дагалдах хэрэгслээ нийлүүлэх ёстой. Үйл явц жигдрээд ерөнхийдөө долдугаар сарын 15-наас хэвийн үйл ажиллагаандаа орсон.
-Яагаад шинэ жолоочийн үнэмлэх хэвлэлтэнд орохгүй байгаа юм бэ?
-Үнэмлэхээ хаясан үрэгдүүлсэн, эрхээ сэргээлгэж байгаа иргэд түр үнэмлэх авдаг.Түр үнэмлэх гурван сарын хугацаатай байдаг. Тав, Зургаан сард хүмүүст тараагдсан үнэмлэхний хугацаа нь дуусах гээд байгаа учраас хаягдсан үнэмлэхийг дахин хэвлэлтэнд оруулж байна. Хаягдсан үнэмлэхийг хэвлэж дуусгаад шинэ жолоочийн үнэмлэхийг хэвлэж эхэлнэ. Ийм учраас шинэ жолоочийн үнэмлэхний хэвлэлтийг түр зогсоосон гэсэн хариулт өглөө.
...Хэвлэлтийн явц удааширсан ч гэсэн буцаад төлөвлөгөөнийхөө дагуу ажиллана гэдгийг албаны хүн онцолж байлаа. Харин жолооны үнэмлэхээ хүлээж буй иргэдийн төлөөлөл болох Л.Номин “Жолооны курсээ төгсөөд хоёр сар гаруйн хугацаа өнгөрч байна. Жолооны үнэмлэх одоог хүртэл гараагүй. Ядаж байхад жолооны түр үнэмлэх олгохгүй гэсэн болохоор машинаа ч барьж чадахгүй, хэцүү байна” гэж учирлав.
Ямартай ч албаны хүний хэлснээр жолооны үнэмлэхний хэвлэлт буцаад хэвийн байдалдаа орсон байна. 40 мянга гаруй үнэмлэх хэвлэх байснаас өнөөдрийн байдлаар 22 мянга 893 үнэмлэх хэвлэлтэд орох дутуу байгаа гэнэ. Эдгээр үнэмлэхийг 45 хоногийн дотор хэвлэж дуусах юм байна.
сэтгэгдэл байхгүй